KÁRAHNJÚKAVIRKJUN
Verkkaupi: Landsvirkjun
Framkvæmdakostnaður: 130 milljarðar (heildarkostnaður við virkjunina)
Verkefni Hnits: Framkvæmdaeftirlit á stíflusvæði og í aðrennslisgönum var í höndum samsteypu nokkurra innlendra og erlendra verkfræðistofa sem var lægstbjóðandi í útboði verkkaupa í framkvæmdaeftirlit. Samsteypan kallaðist VIJV. Starfsmenn Hnits komu að eftirliti með flestum verkþáttum varðandi framkvæmdina s.s. bergþéttingu í stíflugrunnum, byggingu jarðvegsstíflna, uppsteypu á távegg, steypukápu á aðalstíflu og yfirfallsmannvirkjum auk jarðgangagerðar. Hnit hafði auk þess umsjón með öryggis- og umhverfismálum á svæðinu. Starfsmaður Hnits var aðstoðarstaðarverkfræðingur á Kárahnjúkasvæðinu. Verkið var unnið á árunum 2003-2008. Hnit annaðist einnig allar eftirlitsmælingar. Hnit sá um útboð og eftirlit á frágangsverkum eftir virkjunarframkvæmdir á árunum 2009-2010.
Hnit annaðist fjölbreytt verkefni vegna framkvæmda við hluta Kárahnjúkavirkjunar. Þau fólust m.a. í eftirliti og framkvæmdastjórnun vegna byggingar þriggja stífla sem mynda Hálslón og gerð aðrennslisganga að fallgöngum við Teigsbjarg. Hálslón er 57 ferkílómetrar að stærð.
Aðalstíflan við Hálslón sem kallast Kárahnjúkastífla þverar syðsta hluta Hafrahvammagljúfra vestan í Fremri-Kárahnjúk og er 190 metra há og 800 metra löng. Kárahnjúkastífla er gerð úr grjóti og þjöppuðu malarefni og með steyptri kápu á vatnshliðinni. Um 9 milljónir rúmmetra af fyllingu þurfti í stífluna. Beggja vegna Kárahnjúkastíflu eru tvær minni stíflur úr jarðvegi með þéttikjarna úr jökulruðningi; Desjarárstífla (65 metra há) og Sauðárdalsstífla (25 metra há). Samtals þurfti um 4 milljónir rúmmetra af fyllingu í hliðarstíflurnar tvær. Stíflurnar þrjár eru samanlagt um 3 km að lengd.
Úr Hálslóni er vatninu veitt um aðrennslisgöng sem liggja austur Fljótsdalsheiði að gangamótum við veitugöng úr Ufsarlóni suðaustan við Þrælaháls. Þaðan liggja ein göng norðaustur heiðina út í Teigsbjarg, skammt innan við Valþjófsstað. Með þessu fyrirkomulagi má nota miðlun í Hálslóni þannig að rennsli beggja jökulánna nýtist fyrir virkjunina. Göngin frá Hálslóni að Teigsbjargi eru um 40 km löng og til viðbótar koma ríflega 13 km göng úr Ufsarlóni. Göngin úr Hálslóni eru 7,2 - 7,6 metrar í þvermál, heilboruð að verulegum hluta. Göngin úr Ufsarlóni eru um 5,5 metrar í þvermál og einnig heilboruð að verulegum hluta.